ဒေါသစိတ်ကို ကိုင်တွယ်ဖြေရှင်းခြင်း – အပိုင်း၂

ဒေါသစိတ်ကိုကိုင်တွယ်ဖြေရှင်းခြင်း – အပိုင်း၂

ရေးသားသူ – Dr. Htein Linn Aung

ရည်ရွယ်ချက်ကတော့ စိတ်တိုစရာကြုံလာတဲ့အခါမှာ စိတ်ရော ကိုယ်ပါရန်လို ဒေါကန်လာတာတွေကို သတိပြုမိပြီး ဖြေလျှော့နိုင်ဖို့ ဖြစ်ပါတယ်။

ဒေါသစိတ်ကို ထိန်းချုပ်ချင်တယ် ဆိုရင်တော့ ပထမဦးဆုံး ဒေါသစိတ်ရဲ့ သဘောသဘာဝကို နားလည်အောင်လုပ်ရပါမယ်။ ပြီးရင် ကိုယ်ဘာကြောင့်ဒေါသထွက်လေ့ရှိလဲဆိုတာ သိအောင်လုပ်ရပါမယ်။ သိလာရင် အဲအကြောင်းအရာတွေကို တတ်နိုင်သလောက် ရှောင်ရပါမယ်။ ကြုံလို့ဒေါသထွက်မိရင်လဲ သတိထားမိပြီး အရင်လို လွှတ်မထားဘဲ ဒေါသစိတ်ကို ဖြေလျှော့ရပါမယ်။

ဒီလို လုပ်နိုင်ဖို့အတွက်က အလေ့အကျင့်လိုပါတယ်။ နည်းလမ်းတွေလဲ ရှိပါတယ်။ အဲနည်းလမ်းတွေကို ဖော်ပြပေးပါ့မယ်။

• ဒေါသကိုထိန်းချုပ်ဖို့နည်းလမ်းများ
• ဖြေလျှော့ခြင်းနည်းလမ်းများ (Relaxation Techniques)

ဒီမှာ စိတ်ကိုဖြေလျှော့တာနဲ့ ကိုယ်ကို ဖြေလျှော့တာဆိုပြီး ၂ နည်းရှိပါတယ်။ ဒီနည်းတွေက ဘာမဟုတ်သလိုထင်ရပေမဲ့ လက်တွေ့မှာ တကယ်အကျိုးများလို့ တွင်တွင်ကျယ်ကျယ် အသုံးပြုနေကြပါတယ်။

#စိတ်ကိုဖြေလျှော့ခြင်း
ဒီနည်းကိုတော့ ဒေါသထွက်ချိန်မှာတင်မကဘဲ စိုးရိမ်စိတ်လွန်ကဲချိန်၊ ကြောက်လန့်မိချိန်တွေစတဲ့ ရုတ်တရက်စိတ်ဖိစီးစရာ ကြုံလာတဲ့အခါတွေမှာ အသုံးဝင်ပါတယ်။

#သတိကပ်ပြီးအသက်ပြင်းပြင်းရှုနည်း (Deep Breathing)
ဒေါသထွက်ပြီလို့ သိလိုက်တာနဲ့

• အဆင့် (၁) အသက်ရှုထုတ်လိုက်ပါ။
• အဆင့် (၂) ၁…၂…၃…၄ ရေတွက်ရင်း ဖြေးဖြေးချင်း ရှုသွင်းပါ။ တချို့ကလဲ “စိတ်လျော့၊ အေးဆေး” စတဲ့ စိတ်လျော့ စေမဲ့ စကားလုုံးတွေကို သုံးရင်း ရှုခိုင်းပါတယ်။
• အဆင့် (၃) ၁ ကနေ ၄ ထိ ရေတွက်ရင်း အသက်အောင့်ထားပါ။
• အဆင့် (၄) ၁..၂..၃..၄ ထိ ရေတွက်ရင်း ဖြေးဖြေးချင်း ရှုထုတ်ပါ။

ဒေါသစိတ်ငြိမ်သွားတဲ့အထိ ထပ်တလဲလဲ လုပ်ဆောင်ပါ။ ဒါပေမဲ့ ပြင်းပြင်းထန်ထန်နဲ့ ဆက်တိုက်လုပ်တာမျိုး မလုပ်ဘဲ ကြားထဲမှာ ပုံမှန်အသက်ရှုပေးပါ။

ဒေါသထွက်တဲ့အခါမှာ လေကို တိုတိုနဲ့မြန်မြန် ရှုလေ့ရှိတာမို့ ဦးနှောက်မှာ အောက်ဆီဂျင်မဝဖြစ်စေကာ ပိုစိတ်ဖီးစီး ပိုဒေါသထွက်လာစေပါတယ်။ အခုလို နှေးနှေးနဲ့ ဝဝရှုသွင်းတဲ့အခါ စိတ်ဖိစီးမှုလဲ လျော့လာသလို အောက်ဆီဂျင်လဲ ဝလာလို့ အမှားအမှန်ကို စဉ်းစားနိုင်စွမ်းရှိစေပါတယ်။

#ကိုယ်စိတ်သက်သာရာရစေတဲ့အဖြစ်အပျက်တွေကိုစိတ်ကူးမြင်ယောင်ကြည့်ခြင်း
ဒီနည်းလမ်းကတော့ စိတ်တိုစရာကိစ္စကြုံလာတဲ့အခါမှာ စိတ်အေးချမ်းစေတဲ့၊ စိတ်သက်သာစေတဲ့အရာတွေကို စနစ်တကျ စိတ်ကူးယဉ်ပုံဖော်တဲ့နည်း ဖြစ်ပါတယ်။

ကိုယ်ကြိုက်တဲ့အစားအစာအကြောင်းတွေးပြီး မြင်ယောင်မိလိုက်တာနဲ့ တွံတွေးထွက်လာတတ်တာမျိုးကို ကြုံဖူးကြမှာပါ။ အဲလို စိတ်နဲ့ ကိုယ် အပြန်အလှန်ဆက်သွယ်နေတဲ့ သဘောတရားကို အခြေခံထားတာပါ။
ဒီနည်းက အလေ့အကျင့်တော့လိုပါတယ်။

• သက်သောင့်သက်သာရှိပြီး အေးဆေးတဲ့ နေရာတစ်ခုရှာပါ။
• သတိကပ်ပြီး အသက်ကို ဖြေးဖြေးနဲ့ ၀၀ ရှုပြီး ခန စိတ်ရောကိုယ်ပါလျှော့ပါ။
• မျက်စိမှိတ်ပါ။
• ကိုယ်နှစ်သက်တဲ့ ပင်လယ်ကမ်းခြေ၊ တောတောင်ရူခင်း စတဲ့ နေရာတွေကို စိတ်ကူးပြီး မြင်ယောင်ကြည့်ပါ။
• ကိုယ့်ကိုယ်ကို သက်သောင့်သက်သာနဲ့ စိတ်အေးချမ်းလာပြီလို့ မြင်ယောင်ကြည့်ပါ။
• ကိုယ်စိတ်ကူးနေတဲ့ နေရာနဲ့ဆက်စပ်တဲ့ တခြားအရာတွေရဲ့ အထိအတွေ့တွေကိုလဲ ပုံဖော်ကြည့်ပါ။ ဥပမာ – ကမ်းခြေရောက်နေတယ်လို့ စိတ်ကူးနေရင် ရေလှိုင်းပုတ်သံတွေ၊ နေရောင်ခြည်ရဲ့ နွေးထွေးတဲ့ အထိအတွေ့၊ ကမ်းခြေက သဲနဲ့ ခြေနဲ့ထိတွေ့နေတဲ့အထိအတွေ့ စတာတွေကိုပါ တလှည့်စီ တွေးကြည့်ပါ။
• ဒီလိုလုပ်ခြင်းအားဖြင့် ကိုယ့်စိတ်ကူးပုံက တကယ်ပုံပေါ်လာပြီး စိတ်ကတကယ်ရောက်နေသလို ခံစားလာရမှာပါ။ တချို့တွေကလဲ applicationတွေ အသုံးပြုကြပါတယ်။
• အဲလို စိတ်ကူးနဲ့တွေးတာကို ၅ မိနစ်ကနေ ၁ဝမိနစ် ဒါမှမဟုတ် စိတ်အေးချမ်းတဲ့ထိတွေးပေးပါ။
• စိတ်သက်သောင့်သက်သာဖြစ်လာရင် နောက်ကျရင်လဲ အခုလို စိတ်အပန်းဖြေချင်ရင် ဒီနေရာလာပြီး အပန်းဖြေရမယ်လို့ တွေးပါ။
• မျက်စိဖွင့်ပြီး တကယ့်လက်တွေ့ဘဝမှာ အားအင်သစ်နဲ့ ပြန်နေထိုင်လို့ရပါပြီ။
• Defense Mechanism ထဲက Fantasy thinking နဲ့လဲ သဘောတရားတူပါတယ်။

ဒီနည်းကကျတော့ ပိုစနစ်ကျပြီး လက်တွေ့ပိုဆန်ပါတယ်။

#ကြွက်သားတွေကိုဖြေလျော့ခြင်း (Progressive Muscle Relaxation – PMR)
အပိုင်း ၁ မှာ ဖော်ပြခဲ့သလို ဒေါသထွက်လာတဲ့အခါမှာ ကြွက်သားတွေ တောင့်တင်းလာပါတယ်။ အဲတာတွေကို လျှော့ချတဲ့နည်းလမ်းဖြစ်ပါတယ်။

အသက်ကို ဖြေးဖြေးနဲ့ မှန်မှန်ရူရင်း ကိုယ်မှာရှိတဲ့ ကြွက်သားတွေကို တစ်အုပ်စုခြင်း တောင့်တင်းအောင် ခနလုပ်ပြီး လျော့စေတဲ့နည်းပါ။ ဒီနည်းကို စိတ်ဖိစီးတဲ့အခါတွေမှာ အသုံးပြုလေ့ရှိပါတယ်။

ရေးပြတာထက် ပိုမြင်သာအောင်လို့ Johns Hopkins က တင်ထားတဲ့ youtube လင့် တင်ပေးလိုက်ပါတယ်။

တခြား Yoga လိုမျိုး ပေါ့ပေါ့ပါးပါး လေ့ကျင့်ခန်းများကိုလဲ လုပ်ဆောင်ပေးပါ။ ဒါမှ ကြွက်သားတွေ အကြောတွေ ပြေလျော့နေပြီး ဒေါသထွက်ချိန်မှာ အရမ်းမတောင့်တင်းတတ်တော့ပါဘူး။

ဒီနည်းလမ်းတွေကို ထပ်ခါထပ်ခါလေ့ကျင့်ပေးပါ။ ဒါမှသာ တကယ်ဒေါသထွက်ချိန်ကျ အလိုအလျောက် အသုံးပြု နိုင်မှာ ဖြစ်ပါတယ်။

#အတွေးအမြင်များကိုပြန်လည်ပြုပြင်ခြင်း (#Cognitive_Restructuring)
လွဲမှားနေတဲ့ အလိုအလျောက်တွေးခေါ်ပုံတွေကို ပြန်ပြုပြင်တဲ့နည်းဖြစ်ပါတယ်။ စိတ်ပညာရှင် Albert Ellis က ၁၉၅၀ ဝန်းကျင်လောက်မှာ စတင်အသုံးပြုခဲ့ပါတယ်။

ဒီနည်းကတော့ စိတ်တိုတဲ့အချိန်မှာ သုံးဖို့မဟုတ်ပါဘူး။ ကိုယ့်ကိုယ်ကို နားလည်အောင် ဆန်းစစ်ပြီး ဒေါသစိတ်ကိုလျှော့ချတဲ့နည်းပါ။

တခါတလေ ဒေါသအကြီးအကျယ်ထွက်စရာမဟုတ်ပေမဲ့ ဦးနှောက်က ခြိမ်းခြောက်နေတယ်လို့ယူဆပြီး ပြန်တုံ့ပြန် တဲ့အခါမှာ ဒေါသပုန်ထတတ်ပါတယ်။

ဥပမာ အစပ်ကြောက်တဲ့သူက မကြိုက်ပေမဲ့ ငြုတ်သီးမြင်ချိန်မှာ တွံတွေးထွက်လာတတ်တာမျိုးပါ။ အဲလိုမဖြစ်အောင်လို့ ကြိုတင်ကာကွယ်တဲ့ နည်းပါ။

အကြမ်းဖျဉ်းအားဖြင့် –

• သက်သာသက်သာနေပါ။
• ဒေါသထွက်တတ်တဲ့ အခြေအနေတွေကို ချရေးပါ။
• အဲအခြေအနေတွေမှာ ခံစားရတဲ့ စိတ်နေစိတ်ထားကို ဖော်ထုတ်ပါ။
• တခါတလေ အတွေးလား စိတ်နေစိတ်ထားလား မကွဲပြားတတ်ပါဘူး။

လွယ်လွယ်ခွဲခြားနည်းကတော့ စိတ်နေစိတ်ထားက စကားတစ်လုံးနဲ့ဖော်ပြနိုင်ပြီး အတွေးတွေကတော့ ပိုရှုပ်ထွေးပါတယ်။ ဥပမာ “အစည်းအဝေးတုန်းက လူရှေ့သူ့ရှေ့မှာ ငါ့ကို မထီမဲ့မြင်ပြုတယ်” ဆိုတာက အတွေးဖြစ်ပြီး ဒေါသထွက်တယ်၊ စော်ကားတယ်ဆိုတာက စိတ်နေစိတ်ထားဖြစ်ပါတယ်။

အဲလို ခံစားရချိန်မှာ ဘာတွေတွေးမိလေ့ရှိလဲ ချရေးပါ။ ဒီအတွေးတွေက automatic thoughts တွေဖြစ်ပါတယ်။ ဒီအတွေးတွေအကြောင်းကို အောက်ကလင့်မှာ ပြန်ဖတ်ရူနိုင်ပါတယ်။

ဘာတွေကြောင့် အဲလိုအတွေးတွေ တွေးမိနေလဲဆိုတာ ဓမ္မဓိဌာန်ကျကျသုံးသပ်ပါ။

ငါ့အတွေးတွေက ခံစားချက်အရ တွေးနေတာလား၊ တကယ့်အချက်အလက်တွေအရ တွေးမိနေတာလား သုံးသပ်ပါ။

အလိုအလျောက်အတွေးတွေနဲ့ ဆန့်ကျင်နေတဲ့အချက်တွေကို ရှာပါ။

အလိုအလျောက်တွေးခေါ်ပုံတွေက ဘက်လိုက်ပြီး ယုတ္တိမရှိပေမဲ့ အမြစ်တွယ်နေတာမို့လို့ လွယ်လွယ်နဲ့ ဖယ်ရှားလို့မရပါဘူး။ ဒါကြောင့် အဲအတွေးတွေဟာ မှားနေကြောင်း ယုံကြည်လာဖို့အတွက် ယုတ္တိရှိတဲ့ သက်သေတွေလိုပါတယ်။

မျှမျှတတနဲ့ တခြားဖြစ်နိုင်ခြေတွေကို ဖော်ထုတ်ပါ။

ဒီအဆင့်မှာတော့ Every story has two sides ဆိုသလိုပဲ ၂ ဖက်မျှမျှတတတွေးပါ။ E.g. ကားမောင်းနေတုန်း တခြားတစီးက ဇွတ်အတင်းကျော်မောင်းသွားချိန်မှာ ဒေါသထွက်တတ်ပါတယ်။ အဲကားမှာ အရေးပေါ်လူနာပါနေလို့ ကျော်သွားတာမျိုး ဖြစ်နေနိုင်တယ်ဆိုတာမျိုး တွေးပါ။

ကိုယ့်ရဲ့လက်ရှိ စိတ်နေစိတ်ထားကို စောင့်ကြည့်ပါ။

အခုလိုသုံးသပ်ပြီးတဲ့အခါ ကိုယ့်ကိုယ်ကိုရှင်းရှင်းလင်းလင်းသိလိုက်ရတော့ စိတ်လက်ပေါ့ပါးသွားပါလိမ့်မယ်။ နောက်တချိန်အလားတူဖြစ်ရပ်မျိုး ကြုံလာတဲ့အခါမှ အလိုအလျောက်တွေးမိပြီး ဒေါသထွက်လာတာကို ရှောင်နိုင်မှာ ဖြစ်ပါတယ်။

ဒီနည်းကတော့ တစ်ယောက်ထဲလုပ်တာထက် ကျွမ်းကျင်သူတွေနဲ့ တိုင်ပင်ဆွေးနွေးပြီး လုပ်တာက ပိုထိရောက်ပါတယ်။

#ပြဿနာဖြေရှင်းနည်း
ဘဝမှာ ရှောင်လွဲမရနိုင်တဲ့ ပြဿနာတွေ ကြုံရတဲ့အခါမှာ ဒေါသထွက်တာ၊ ဒေါသူပုန်ထတာဖြစ်လေ့ရှိပါတယ်။ ပြဿနာတိုင်းမှာ အဖြေရှိတယ်ဆိုတဲ့ အယူကြောင့်လဲ ဖြေရှင်းနိုင်မဲ့နည်းလမ်းရှာမတွေ့တဲ့အခါ ဒေါသထွက်တတ်ကြပါတယ်။

ဒီလိုအခြေအနေကြုံလာရင် ဖြေရှင်းနိုင်မဲ့ နည်းလမ်းရှာတာထက် ဘယ်လိုရင်ဆိုင်မယ်၊ ဘယ်လိုကိုင်တွယ်မလဲ ဆိုတာကို အာရုံစိုက်သင့်ပါတယ်။

ကိုယ်မဖြေရှင်းနိုင်တဲ့ အခြေအနေကိုလဲ လက်ခံနိုင်ဖို့လိုပါတယ်။

ပြဿနာဖြေရှင်းရာမှာလဲ နည်းလမ်းတွေရှိပါတယ်။

ဒေါသထွက်ပြီးဖြေရှင်းတာက emotional problem solving ဖြစ်ပြီး ပြဿနာကို တကယ်ဖြေရှင်းနိုင်ခြင်းမရှိပါဘူး။

တကယ့်ပြဿနာကို ဖြေရှင်းနည်းတွေကို လေ့လာပါ။ အကြမ်းအားဖြင့်

• ပြဿနာကို ဖော်ထုတ်ခြင်း
• ပြဿနာကို ပုံဖော်ခြင်း
• ဖြစ်နိုင်ခြေရှိတဲ့ ဖြေရှင်းနည်းတွေ ရှာခြင်း
• သုံးမဲ့နည်းလမ်းကို ရွေးချယ်ဆုံးဖြတ်ခြင်း
• ဖြေရှင်းခြင်း နဲ့
• ပြန်လည်သုံးသပ်ခြင်း

တို့ပါဝင် ပါတယ်။

#ပေါင်းသင်ဆက်ဆံရေးပိုကောင်းအောင်လုပ်ခြင်း
များသာအားဖြင့် လူတွေဟာ ဒေါသထွက်လာရင် စကားဆုံးအောင် နားမထောင်ဘဲ အလျင်စလို ကောက်ချက်ချ ပြီးတာနဲ့ ခေါင်းထဲပေါ်လာတာကို ချက်ချင်း ပြောပစ်တတ်ကြပါတယ်။

ဒါကြောင့် စကားပြောရင် စကားဆုံးအောင် နားထောင်ပါ။ ကိုယ်အထင်ထက် သူဘာပြောချင်တာလဲဆိုတာ နားလည်အောင် ကြိုးစားပါ။ သူတပါးရဲ့ ခံစားချက်ကို နားလည်အောင်လုပ်ပါ။

စိတ်တိုနေချိန် ချက်ချင်းစကားမပြန်ဘဲ ဘယ်လိုတုံ့ပြန်မလဲဆိုတာ အချိန်ယူစဉ်းစားပါ။ စကားထပ်မပြောနိုင်လောက်အောင် ဒေါသထွက်လာရင် ခနလေးဆိုပြီး ခနရှောင်ထွက်ပါ စိတ်လျော့ပါ။ ပြီးမှ ဆက်ပြောပါ။

ကိုယ်ဒေါသထွက်လာချိန်မှာ ကိုယ်လိုချင်တာကို စိိတ်အေးအေးနဲ့ ပြန်ပြောနိုင်အောင် လေ့ကျင့်ပါ။

ဒေါသစိတ်ထွက်ချိန်က ခနလေးပါ။ မထိန်းချုပ်နိုင်ဘဲ ပြောချင်ရာပြောမိ၊ လုပ်ချင်ရာလုပ်မိရင် ပြန်ပေးဆပ်ရမှာက နောင်တရစိတ်ညစ်တာကနေ ထောင်ကျသွားတာထိဖြစ်နိုင်ပါတယ်။ ဒါကြောင့် အဲခနတာကို ကြိုးစားထိန်းပါ။

#ဟာသဉာဏ်သုံးခြင်း
ရူးနှမ်းနှမ်းနိုင်တဲ့ ဟာသဆန်တဲ့အတွေးတွေကလဲ ဒေါသစိတ်ကို လျော့ချစေနိုင်ပါတယ်။

အဓိကကတော့ အလေးအနက်တွေ ခံစားပြီး ဒေါကန်နေရာကနေ ဟာသအတွေးတွေးပြီး ပေါ့ပေါ့ပါးပါး ဖြစ်စေတာပါ။ ဟာသဆန်တဲ့အတွေးဆိုတာလဲ ကိုယ်တကယ်ကို ရီချင်တဲ့ အတွေးတွေဖြစ်သင့်ပါတယ်။

ဥပမာ – ဒေါသထွက်တဲ့သူကို ဝက်ခေါင်းနဲ့မြင်ကြည့်တာမျိုး

သတိပြုရမှာက – တကယ့်ပြဿနာတွေကို ဟာလုပ်မလုပ်ပါနဲ့။ ကြမ်းကြမ်းတမ်းတမ်းနဲ့ ငေါ့တော့တော့ဟာသမလုပ်ပါနဲ့။ ဒါကကျ ဒေါသစိတ်ဖြေရှင်းတာမဟုတ်ဘဲ မကောင်းတဲ့ ဒေါသစိတ်ဖော်ခြင်းတမျိုးဖြစ်သွားပါတယ်။

#ပတ်ဝန်းကျင်ကိုပြောင်းလဲခြင်း
တခါတလေမှာလဲ စိတ်ရှုပ်နေတဲ့အချိန်မှာ ပတ်ဝန်းကျင်ကလဲ ဒေါသထွက်စေပါတယ်။
ဒါကြောင့် ကိုယ်စိတ်ရှုပ်တတ်တဲ့အချိန်တွေမှာ ကိုယ်ပိုင်ချိန်ပေးတာ၊ သက်သောင့်သက်သာရှိမဲ့ နေရာ ရွေးပြီး နားတာလုပ်ပါ။

ဥပမာ – အလုပ်ကပြန်လာချိန် ဘယ်သူနဲ့မှ စကားမပြောသေးဘဲ ၁၅မိနစ်လောက် တယောက်ထဲနားပြီးမှ အိမ်ကလူတွေနဲ့ တွေ့တာ၊ အိမ်အလုပ်လုပ်တာမျိုး

#အချိန်သတ်မှတ်ခြင်း
အိမ်ထောင်သည်တွေ မကျေနပ်ချက်တွေပြောချင်ရင် စိတ်ရှုပ်နေတဲ့အချိန်မပြောမိအောင် အချိန်သပ်သပ် သတ်မှတ်ပြီး အဲချိန်မှ ပြောကြတာမျိုးပါ။

#တခြားနည်းလမ်းတွေကြိုရှာထားခြင်း
ကြုံတွေ့တတ်တဲ့ အခက်အခဲတွေကို ကြိုတွေးပြီး တခြားနည်းလမ်းရှာထားတာမျိုး
ဥပမာ – လမ်းပိတ်ရင် ဘယ်လမ်းတွေက သွားမယ်၊ စီးနေကျ Bus ကားကျပ်ရင် ရထားနဲ့သွားမလား၊ တခြား Bus ကား ၂ဆင့်စီးသွားမလား ကြိုတင်လေ့လာထားတာမျိုး

#ရှောင်ရန်အချက်များ
တစ်ချိန်ထဲမှာ အလုပ်အများကြီး မလုပ်ပါနဲ့၊ လွယ်လွယ်ကူကူပြီးနိုင်သလောက် နည်းနည်းစီခွဲလုပ်ပါ။

ကိုယ်မပြောင်းလဲနိုင်တဲ့ အရာတွေကိုပဲ အာရုံစိုက်မနေပါနဲ့။ ကိုယ်စိတ်သက်သာရာရအောင် ကြိုးစားတွေးပါ။

ဒေါသကို ဖြေဖျောက်ဖို့ ဆေးလိပ်၊အရက်၊ မူးယစ်ဆေး သုံးတာမလုပ်ပါနဲ့။ ဒေါသစိတ် အရှင်းမပျောက်တဲ့အပြင် စိတ်ကျန်းမာရေးပါထိခိုက်လာနိုင်ပါတယ်။

ဒါကြောင့် ဒေါသစိတ်ကို စနစ်တကျနဲ့ ဖြေရှင်းနိုင်အောင် ကြိုးစားလေ့ကျင့်ဖို့ အကြံပြုလိုက်ပါတယ်။

Source: www.apa.org / www.mentalhelp.net