သွားဖုံးကနေ သွေးတွေ ဘာကြောင့် ယိုလာသလဲ?
ရေးသားသူ – ဒေါက်တာမျိုးမြင့်အောင်
ကျွန်တော်တို့ သွားတိုက်အခါ ဒါမှမဟုတ် အသီးတွေကို ကိုက်လိုက်တဲ့အခါ သွားဖုံးကနေ သွေးတွေထွက်လာတာကို ကြုံဖူးကြမယ်ထင်ပါတယ် ။
ဒီလို သွားဖုံးကနေ သွေးတွေထွက်လာတာကို သတိထားလိုက်မိပေမယ့် လူတော်တော်များများက ဒါကို လစ်လျူရူ့လိုက်ကြတာများတယ်ဗျ ။ တကယ်တော့ သွားဖုံးကနေ သွေးထွက်လာတာဟာ သွားဖုံးရောဂါတွေ ဖြစ်မယ်တော့လို့ အချက်ပြလိုက်တဲ့သဘောပါပဲ ။
ကျန်းမာတဲ့ သွားဖုံးတွေကနေ သွေးတွေ ထွက်လေ့မရှိပါဘူး ။ ကျန်းမာတဲ့ သွားဖုံးတွေဟာ ပန်းရောင်ဖျော့ဖျော့ အရောင်ရှိပြီး မျက်နှာပြင်ပုံစံက လိမ္မော်သီးအခွံလိုပဲ အဖုအထစ်လေးတွေရှိသဗျ ။ ဆိုလိုတာက တင်းပြောင်မနေဘူးပေါ့နော် ။ ကျန်းမာတဲ့သွားဖုံးကနေ အနံ့ဆိုးတွေလည်း ထွက်လေ့မရှိပါဘူး ။ သွားဖုံးကနေ သွေးတွေထွက်လာဖို့ အကြောင်းအရင်းအမျိုးမျိုးရှိပါတယ် ။
အဓိက အကြောင်းအရင်းကတော့ သွားဖုံးရောင်တာပါပဲ ။ သွားဖုံးရောင်တာဟာ ရေစီးကမ်းပြိုရောဂါ (သွားဖုံးရောဂါ) ရဲ့အစဖြစ်ပါတယ် ။
ခံတွင်းသန့်ရှင်းမွုမကောင်းတဲ့သူတွေမှာ အစားကြွင်းအစာကျန်တွေဟာ သွားချေးတွေအနေနဲ့ ပါးစပ်ထဲကျန်ခဲ့လေ့ရှိပါတယ် ။ ဒီသွားချေးတွေမှာ ဘက်တီးရီးယားပေါက်ဖွားပြီး အဲ့ဒီဘက်တီးရီးယားတွေဟာ အဆိပ်တစ်မျိုးကို ထုတ်လုပ်ပါတယ် ။ ကျွန်တော်တို့ ခန္ဓာကိုယ်ရဲ့ ခုခံအားကနေ အဲ့ဒီအဆိပ်တွေကို တုံ့ပြန်တဲ့အခါ သွားဖုံးစရောင်လာတော့တာပါပဲ ။
သွားဖုံးစရောင်ပြီး သွေးတွေထွက်လာတာကို လစ်လျူရွုလိုက်မယ်ဆိုရင် ဘက်တီးရီးယားတွေဟာ သွားဖုံးမှတဆင့် သွားအမြစ်ပတ်ပတ်လည်ကို စတင်တိုက်ခိုက်ပါတော့တယ် ။ ဒါဆို သွားဟာ အနည်းငယ်ကြွလာမှာ အမှန်ပဲ ။ ခိုင်ခန့်မွုလည်း လျော့နည်းလာပါလိမ့်မယ် ။
ဒီထက်ပိုပီးဆိုးလာရင်တော့ ဘက်တီးရီးယားတွေဟာ သွားပေါက်နေတဲ့ မေးရိုးအထိပါရောက်လာပြီး သွားဟာ ယိုင်နဲ့လာပါတော့တယ် ။ နောက်ဆုံးအဆင့်ကတော့ သွားဟာ ကျွတ်ထွက်သွားတော့တာပါပဲ ။
ဒါကတော့ ခံတွင်းသန့်ရှင်းမှုမကောင်းလို့ သွားဖုံးရောဂါဖြစ်ရတဲ့အကြောင်းဖြစ်ပါတယ် ။
သွားဖုံးရောဂါဖြစ်နေပြီဆိုရင် ဒီလို လက္ခဏာတွေကို တွေ့ကြုံခံစားရမှာဖြစ်ပါတယ် ။
- သွားဖုံးက နီနီရဲရဲနဲ့ တင်းပြောင်ပြီးရောင်နေမယ် ။
- ခံတွင်းနံ့ ဆိုးရွားမယ် ။
- ခံတွင်းထဲမှာလည်း အရသာက မကောင်းဘူး ။ ပုတ်အဲ့အဲ့လို အရသာမျိုးရမယ် ။
- သွားတွေ ကြွလာမယ် ။ ယိုင်နဲ့လာမယ် ။
- သွားပတ်လည် အနီးတစ်ဝိုက်မှာ ပြည်တွေတည်လာမယ် ။
- တံတွေးထဲ သွေးတွေပါလာမယ် ။
- သွားတိုက်တဲ့အခါ၊ အစာမာမာတွေစားတဲ့အခါ၊ တံတွေးထွေးတဲ့အခါ သွေးတွေပါလာမယ် ။
ခံတွင်းသန့်ရှင်းရေးမကောင်းတာကြောင့်မဟုတ်ပဲ သွားဖုံးကနေသွေးထွက်နိုင်တဲ့ တခြားအကြောင်းအရင်းတွေလည်း ရှိပါသေးတယ် ။ ဒါတွေကတော့….
- ဗီတာမင် စီ နဲ့ ဗီတာမင် ကေ ချို့တဲ့ခြင်း ။
- ဟော်မုန်းအပြောင်းအလဲဖြစ်ခြင်း ။ ဥပမာ ကိုယ်ဝန်ဆောင်မိခင်များ ။
- ပိုးဝင်ခြင်း ။ ( Infection) ဥပမာ – သွားကြားထိုးခြင်းကြောင့် သွားဖုံးရောင်လာခြင်း ။
- သွားတိုက်ရာတွင် အားဖြင့် အလွန်အကျွံဖိ၍တိုက်၍ သွားဖုံးပေါက်ပြဲသွားခြင်း ။
- သွေးကင်ဆာ စတဲ့ အခြေအနေေတွေကြောင့်လည်း သွားဖုံးကသွေးထွက်နိုင်ပါတယ် ။
အပေါ်မှာပြောခဲ့တဲ့ သွားဖုံးရောဂါရဲ့ လက္ခဏာတွေဖြစ်နေပြီဆိုရင် သွားနှင့်ခံတွင်းသန့်ရှင်းရေးကို အထူးဂရုစိုက်ပေးပါ ။
သွားဖုံးတွေရောင်တာဟာ သွားသန့်ရှင်းရေးမကောင်းတဲ့အချက်က အဓိကအကြောင်းအရင်းဆိုတော့ ခံတွင်းသန့်ရှင်းရေးကို စနစ်တကျနဲ့ အထူးဂရုစိုက်လိုက်ရင် တစ်ပတ်အတွင်း သွေးထွက်တာတွေ ရပ်သွားမှာဖြစ်ပါတယ် ။
တစ်ပတ်ခန့်သေသေချာချာဂရုစိုက်တာတောင် သွားဖုံးကနေသွေးယိုနေတာက မရပ်သေးဘူးဆိုရင်တော့ မိမိပြနေကျ သွားဘက်ဆိုင်ရာဆရာဝန် သို့မဟုတ် နီးစပ်ရာ သွားနှင့်ခံတွင်းဆေးခန်းမှာ အမြန်ဆုံးသွားရောက်ပြသကြဖို့တိုက်တွန်းချင်ပါတယ် ။
ဒီလို သွားဖုံးကသွေးထွက်တဲ့ လူနာတွေက သွားဖုံးရောင်တဲ့ အဆင့်လေးပဲဆိုရင် ဆေးခန်းမှာ သွားသန့်ရှင်းရေး (Scaling) လုပ်ရုံပါပဲ ။
သွားဖုံးကနေသွေးထွက်တာကို ဂရုမထားပဲ ပစ်ထားမိပြီးမှ အခြေအနေက သွားတွေလွုပ်လာပြီ၊ ပြည်တွေထွက်တဲ့အဆင့်ကိုရောက်လာပြီဆိုရင်တော့ သွားအကြောထုတ်ကုသမွုတွေ သွားနူတ်တာတွေ လုပ်ရနိုင်ပါတယ် ။ ပိုးသတ်ဆေးတွေလည်းသောက်ရနိုင်ပါတယ် ။
ဒါဆို အချိန်တွေကုန် ငွေတွေကုန် လူလည်းပင်ပန်း ။ ဒီလိုအခြေအနေတွေဆို ငွေတွေကုန်တာမှ သွားသန်ရှင်းရေးလုပ်တာထက် (၁၀) ဆခန့် ပိုကုန်ကျနိုင်ပြီး ရက်ချိန်းကလည်း အနည်းဆုံး သုံးလေးခါ ဖြစ်သွားရော ။
ဒီတော့ သွားဖုံးကနေသွေးထွက်တာက နာတာတွေ မဖြစ်ဘူးဆိုပေမယ့် သတိထားမိတာနဲ့ အချိန်မဆွဲသင့်ပဲ စောစီးစွာကုသမွုခံယူသင့်ကြောင်း ဂရုစိုက်သင့်ကြောင်း သတိပေးလိုက်ပါတယ်ခင်ဗျာ။
ချစ်ခြင်းဖြင့်သာမျှဝေပါသည် ။
| Name | ဒေါက်တာမျိုးမြင့်အောင် |
|---|---|
| Degrees | B.D.S (MDY) |
| Biography |
၂၀၁၅ ခုနှစ်မှာ သွားဘက်ဆိုင်ရာဆေးတက္ကသိုလ် မန္တလေး မှ ဘွဲ့ရရှိခဲ့ပြီး မန္တလေးက ပရဟိတဆေးခန်းတွေမှာ (၂) နှစ်ခန့် အခမဲ့ လုပ်အားပေးခဲ့ပါတယ်။ ယခုအခါမှာတော့ မန္တလေးတွင် ကိုယ်ပိုင်သွားနှင့်ခံတွင်းဆေးခန်းကို ဦးဆောင်ဖွင့်လှစ်လျက်ရှိပါတယ်။ မိဘမဲ့ကလေးများ နှင့် ကာယ၊ ဉာဏ မသန်စွမ်း (Handicapped) ကလေးများကို သွားနှင့်ခံတွင်းရောဂါတွေမဖြစ်ရအောင် ဟောပြောပွဲများနှင့် သွားနှင့်ခံတွင်းကျန်းမာရေးစစ်ဆေးပေးခြင်းတို့ကို အလေးပေးဆောင်ရွက်နေပါတယ်။ လူမှုကွန်ရက်၊ TV အစီအစဉ်များ၊ သတင်းစာ၊ မဂ္ဂဇင်း၊ ဂျာနယ်များမှ သွားနှင့်ခံတွင်းကျန်းမာရေးနဲ့ပတ်သက်တဲ့ ဗဟုသုတတွေကို အမြဲမျှဝေနေပါတယ်။ ကျွန်တော့်ရဲ့ သွားနှင့်ခံတွင်းကျန်းမာရေး ဆောင်းပါးများ၊ ဗွီဒီယိုများကို Facebook တွင် "Your Myoe - Your Dentist" Page ၌ကြည့်ရူနိုင်သလို ကိုယ်ပိုင် website ဖြစ်တဲ့ www.yourmyoe.com တွင်လည်း ဖတ်ရှုနိုင်ပါတယ်။ |
| Topic |
|
| Address |
|
