အံဆုံးတွေကို နူတ်လိုက်ပါ

အံဆုံးတွေကို နူတ်လိုက်ပါ

ရေးသားသူ – ဒေါက်တာမျိုးမြင့်အောင်

ဂွတီးဂွကျပြောရရင် အံဆုံးတွေဟာ အံဆုံးတွေမို့လို့ကို နူတ်သင့်ပါတယ် ။ အံဆုံးတွေကလည်း ဂွတီးဂွကျကောင်တွေကိုး…။ အံဆုံးတွေက ဒီလိုအခြေအနေတွေဖြစ်လာပြီဆိုရင် နူတ်လိုက်ပါ ။

(၁) နာလာပြီဆိုရင် နူတ်ပါ ။
အံဆုံးတွေက ကျွန်တော်တို့ကို ဘယ်လိုတွေ ဒုက္ခပေးသလဲဆိုတာကို မနေ့ကပဲ ဖော်ပြခဲ့ပြီးပါပြီ ။
အရင်အပိုင်းမှာ ဖော်ပြခဲ့တဲ့ ပြဿနာတွေဖြစ်တဲ့ ကန့်လန့်ကြီးပေါက်နေခြင်း ၊ ကပ်လျက်ရှေ့သွားကို ပျက်စီးစေခြင်း ၊ သွားဖုံးတွေကိုရောင်စေခြင်း၊ တစ်ဝက်တပျက်ပေါက်နေခြင်း စတာတွေကြောင့် အံဆုံးဟာ နာတတ်သလို ဘာအကြောင်းပြချက်မှမရှိပဲလဲ နာတတ်တာကို တွေ့ဖူးပါတယ် ။

ဒီတော့ နာလာရင်နူတ်ပါ ။
ဆန္ဒရှိရင် အံဆုံးကို မနာခင်လည်း ကြိုနူတ်ပါ ။ နိုင်ငံတချို့က ရှေ့တန်းထွက်မယ့် စစ်သားတွေ၊ ပင်လယ်သမုဒ္ဒရာထဲမှာ နေကြရတဲ့ သင်္ဘောသားတွေဟာ ဒီအံဆုံးကို ကြိုနူတ်ထားကြပါတယ် ။ ဒီတော့ နာလာရင်နူတ်ပါ ။

(၂) ဘက်တီးရီးယားတွေဟာ မကြာမကြာ ပေါက်ဖွားနေပီဆိုရင် နူတ်ပါ ။
ဘက်တီးရီးယားတွေပေါက်ဖွားနေတာ ဘယ်လိုသိနိုင်မလဲ ဆိုတာ လွယ်ပါတယ် ။ အထင်အရှားဆုံးလက္ခဏာကတော့ အံဆုံးသွားဖုံးမှာ ပြည်တည်လာတာပေါ့ ။ ဘေးပတ်ပတ်လည်သွားဖုံးတွေရောင်လာမယ် သွေးတွေ၊ ပြည်တွေထွက်နေမယ် ။ ပါးစပ်ဟရတာခက်လာပြီး ပါးစပ်သိပ်မဟနိုင်တော့ဘူး ။ အဲ့နေရာကို အထိမခံနိုင်တော့ဘူး ။ လည်ပင်းတွေမှာ မာမာခဲခဲလေးတွေဖြစ်လာပြီးနာလာတယ် ။

အစားအသောက်တွေလည်းပျက်ပြီး နေမကောင်းချင်သလိုလည်းဖြစ်လာတယ် ။ အံဆုံးဟာ ဒီလိုအခြေအနေရောက်လာရင်လည်း နူတ်ကိုနူတ်သင့်ပါပြီ ။

(၃) အရိုးထဲမှာ အရည်အိတ်လေးဖြစ်နေပြီဆိုရင် နူတ်ပါ ။
ဒါကတော့ ဓာတ်မှန်ရိုက်ကြည့်မှမြင်ရတာမျိုးခင်ဗျ ။ ဒါကြောင့် Dental Check up လုပ်တဲ့အခါ ဓာတ်မှန်ရိုက်ကြည့်သင့်ပါတယ် ။ ဒီအရည်အိတ်လေးဟာ သတိမထားမိပဲ တဖြည်းဖြည်းနဲ့ကြီးလာတဲ့အခါ အရိုးတွေကို စားပစ်သလိုဖြစ်ပြီး နောက်ဆုံးမေးရိုးကြီး ကျိုးသွားတာမျိုးဖြစ်နိုင်ပါတယ် ။ ဒါကြောင့် ဓာတ်မှန်မှာ အရည်အိတ်လေးတွေ့တယ်လို့ ဆရာဝန်ကပြောတာနဲ့ ချက်ချင်း အံဆုံး နူတ်ဖို့စဉ်းစားပါ ။

(၄) အနီးအနားတဝိုက်က သွားတွေကို ထိခိုက်စေတယ်ဆိုရင် နူတ်ပါ ။
အံဆုံးတွေဟာ များသောအားဖြင့် စောင်းပြီးထွက်လာတာရယ်၊ အပြည့်အဝထွက်မလာတာရယ်ကြောင့် အံဆုံးနဲ့ သူ့ရှေ့က သွားကြားမှာ အစာတွေအမြဲကျန်နေတတ်တယ်ဗျ ။

အဲ့ဒီအခါ အံသွားရော ရှေ့ကသွားရော သွားနှစ်ချောင်းလုံးကို ပိုးစားစေတော့တာပါပဲ ။ သွားပိုးစားစေတာတွေတင်မကဘူး တချို့အံဆုံးတွေဟာ အနီးအနားတဝိုက်က သွားတွေကို ယိုင်စေတာ နဲ့စေတာ စောင်းစေတာ အထိပါဖြစ်စေနိုင်ပါတယ် ။ ဒါကြောင့် ဒီလိုအခြေအနေဆိုရင်လည်း နူတ်ဖို့စဉ်းစားပါ ။

(၅) အံဆုံးမှာ ပိုးစားနေပြီဆိုရင် နူတ်ပါ ။
အံဆုံးက အကောင်းကြီးဆိုရင်တောင် ဒုက္ခပေးတတ်တဲ့သဘောရှိလို့ အံဆုံးမှာပိုးစားနေရင်လည်း စိတ်ရှင်းရှင်းနဲ့သာ နူတ်လိုက်ပါ ။

(၆) အံဆုံးကိုနူတ်ပြီးရင် သွားပြန်စိုက်ဖို့မလိုပါ ။
ကဲ အနူတ်လည်းခံရဦးမယ် သွားလည်းပြန်စိုက်ရဦးမယ်ဆိုရင် စိတ်ညစ်စရာကြီး ။ အံဆုံးကတော့ နူတ်ပြီးရင် ပြန်အစားထိုးဖို့မလိုလို့ စိတ်ရှင်းရှင်းနဲ့ နူတ်လိုက်ပါ ။

ဒီအချက် (၆) ချက်ဟာ အံဆုံးကို နူတ်သင့်တဲ့ ယေဘုယျ အကြောင်းအရင်းတွေဖြစ်ပါတယ် ။

ဒါပေမယ့် ကိုယ့်ရဲ့သွားအခြေအနေကို ဆရာဝန်ကသေချာကြည့်ပြီး နူတ်သင့် မနူတ်သင့်ဆုံးဖြတ်ပေးမှာဖြစ်ပါတယ် ။ ဒီနေရာမှာ ဆရာဝန်က နူတ်ဖို့ အကြံပေးခဲ့တယ်ဆိုရင် နူတ်ဖို့ လုံးဝစဉ်းစားပါ ။ မဟုတ်ရင် ဒီခံစားရတဲ့ဝေဒနာက သံသရာတွေလည်နေရော့မယ် ။ ဒီသွားက လူနာတွေကိုလည်း ဒုက္ခတော်တော်ပေးသလို ဆရာဝန်တွေလည်း တော်တော်နူတ်ရခက်တဲ့သွားထဲပါတယ် ။

ဒါကြောင့် အံဆုံးနူတ်တဲ့အခါ မေးရိုးနဲ့ခံတွင်းခွဲစိတ်အထူးကုဆရာဝန်နဲ့ နူတ်တာကတော့ အကောင်းဆုံးပါပဲ ။

ကျွန်တော်ကိုယ်တိုင်လည်း အံဆုံးလူနာတွေကြောင့် အဲကွန်းခန်းထဲမှာ ချွေးတွေ ပေါက်ပေါက်ကျဖူးတယ် ။ ဇောချွေးတွေပျံဖူးတယ် ။ တစ်ခါတလေ သွားနူတ်ချိန်က တစ်နာရီလောက်ကိုကြာသွားရော ။ ဆရာဝန် ဖလက်ပြ ….လူနာဖလက်ပြ ။ သက်ပြင်းတွေချ …ချွေးတွေကျ ။

ပိုက်ဆံတွေ ပိုက်ဆံအိတ်ထဲက အထပ်လိုက်ထွက်သွား…။
သြော် အံဆုံး …အံဆုံး ။
ချစ်ခြင်းဖြင့်သာ မျှဝေပါသည် ။